⁴⁵ალეფ. მე, კაცი მხედველი სიგლახაკისაჲ კუერთხითა გულისწყრომისა მისისაჲთა.

^45aშემიწყნარა მე და წიაღმიმიყვანა ბნელსა და არა ნათელსა,

^45bრამეთუ ჩემ ზედა მოაქცია, შეცვალა ჴელი მისი ყოველსა დღესა.

⁴⁶ბეთ. განკაფნა ჴორცნი ჩემნი და ტყავი ჩემი. ძუალნი ჩემნი დამუსრნა სრულიად.

^46aაღაშენა ძჳნად ჩემდა, და მომიცვა გარე, თავი ჩემი.

^46bრუდუნეულ-ყო, დამსუა მე ბნელსა შინა, ვითარცა მკუდარნი საუკუნენი.

⁴⁷გიმელ. აღეშენა მონად ჩემდა და არა განვიდე, დაამძიმა უღელი ქედისა ჩემისა.

^47aდა თუმცა რამეთუ ღაღად-ვყო და ვჴმობდე, დააყენა ლოცვა ჩემი.

^47bდა ყუნა გზანი ჩემნი მარმაროჲთა, და ალაგნი ჩემნი განრყუნნა.

⁴⁸დალეთ. და თუ დადარანებულ მექმნა მე იგი, ვითარცა დათჳ დადარანებული და ვითარცა ლომი ფარულსა შინა,

^48aმდევნა მე განშორებულსა და განმჭრა მე, დამდვა მე უჩინოქმნილად.

^48bგარდააცუა მშჳლდსა თჳსსა და გამწონა მე, ვითარცა განი, საისრედ.

⁴⁹ჱე. შეაწონა თირკმელთა ჩემთა გესლი კაპარჭთა მისთა,

^49aვექმენ საცინელ ყოველსა ერსა, გასაცხრომელ ვიყავ მათა მარადღე.

^49bგანმაძღო მე სიმწარითა, დამათრო მე ნავღლითა.

⁵⁰ოავ. აღმოფხურნა ქვითა კბილნი ჩემნი. და მაჭამა მე ნაცარი.

^50aდა განაყენა მშჳდობისაგან სული ჩემი, დამავიწყდა მე კეთილი.

^50bდა ვთქუ: წარწყმდა ძლევა ჩემი და სასოებაჲ ჩემი უფლისა მიერ.

⁵¹ზაინ. მოვიჴსენე სიგლახაკისაგან ჩემისა და დევნულებისაგან სიმწარისა ჩემისა და ნავღლისა ჩემისა.

^51aჴსენებით მოვიჴსენენ იგინი. და დადნეს სული ჩემი ჩვენ ზედა.

^51bესე დავიდვა გულსა ჩემსა. ამისთჳს ვესავ მას.

⁵²ჱეთ. წყალობანი უფლისანი მრავალ არიან. არ მომაკლო მე, რამეთუ არ აღესრულნეს მოწყალებანი მისნი.

^52aგანაახლენ იგინი, ვითარცა ცისკარი, განთიადისა. განმრავლდა სარწმუნოებაჲ შენი განთიადთა.

^52bნაწილ ჩემდა უფალი, - თქუა სულმან ჩემმან, - ამისთჳს დაუთმობ მას.

⁵³ტეთ. სახიერ უფალი მოთმინეთა მისთათჳს, სულმან რომელმან იძიოს იგი.

^53aკეთილ არს დათმენაჲ და სასოებაჲ მაცხოვარებისა უფლისაჲ.

^53bკეთილ არს მამაკაცისა, ოდეს აღიღოს უღელი სიჭაბუკესა შინა მისსა მძიმე.

⁵⁴იოთ. დაჯდეს მარტოებით და დადუმნეს, რამეთუ აღიღო თავსა ზედა თჳსსა უღელი მძიმე.

^54aმისცა მიწასა პირი თჳსი, უკეთუ არს სასოება თმენისა.

^54bმისცეს მცემელსა მისსა ღაწჳ, განძღეს ყუედრებათა მიერ,

⁵⁵ხაფ. რამეთუ არა საუკუნომდე განიშოროს უფალმან,

^55aრამეთუ დამამდაბლებელმან შეიწყალოს სიმრავლისაებრ წყალობისა მისისა.

^55bარა მიუგო გულით გამო თჳსით და დაამდაბლნა ძენი კაცთანი.

⁵⁶ლამედ. დამდაბლებად ქუეშე ფერჴთა მისთა ყოველთა კრულთა ქუეყანისათა,

^56aგანდრეკად მშჯავრსა კაცისასა წინაშე პირსა მაღლისასა,

^56bდაშჯად კაცი სასჯელსა შინა თჳსსა, უფალმან არა იხილა.

⁵⁷მემ. ვინ ესრეთ თქუა და იქმნა? უფალმან არა ამცნო.

^57aპირისაგან მაღლისა არა გამოვიდენ ძჳრნი და კეთილნი.

^57bრად დრტჳნავს კაცი ცოცხალი და მამაკაცი ცოდვისათჳს მისისა.

⁵⁸ნონ. გამოძიებულ იქმნა გზაჲ ჩუენი და გაიკითხა და მოვიქცეთ უფლისა მიმართ.

^58aაღვიხუნეთ გულნი ჩუენნი მაღლისა მიმართ ჴელთა ჩუენთა დამკჳდრებულისა ცასა შინა.

^58bჩუენ ვცოდეთ, და უსჯულო ვიქმნენით და შენ არა ლხინება-ჰყავ.

⁵⁹სამეხ. ზედდაგუფარენ, გულისწყრომითა წარმდევნენ ჩუენ, მომკლენ და არა გუერიდე.

^59aზედდაჰბურე ღრუბელი მტკიცე თავსა შენსა ლოცვისათჳს წუხვად ჩემდა და განგებად,

^59bსასიტყუელად და საზრახველად გუყვენ ჩუენ შორის ერსა,

⁶⁰ჳე. აღაღეს ჩუენ ზედა პირი მათი ყოველთა მტერთა ჩუენთა,

^60aშიში და დასულება შეგუემთხჳა ჩუენ, აფხურა და შემუსრვა.

^60bგარდამოსაქანელნი წყალთანი გარდამოადინნეს თუალთა ჩემთა შემუსრვასა ზედა ასულისა ერისა ჩემისასა.

⁶¹აინ. თუალთა ჩუენთა ეურვების და არა დასცხრენ. ნუ იყოფინ ქარვება,

^61aვიდრე არა გარდამოიხილოს და იგულოს ზეცით.

^61bთუალთა ჩემთა მოაკლდა სულსა თანა ჩემსა უმეტეს ყოველთა ასულთა ქალაქისა ჩემისათა.

⁶²სადე. მომნადირებელთა მომინადირეს, ვითარცა სირი მედად, მტერთა ჩემთა.

^62aმოაკუდინა მღჳმესა შინა ცხორებაჲ ჩემი და ზედდადვა ლოდი ჩემ ზედა.

^62bზეშთაგარდაეცა წყალი თავსა ზედა ჩემსა, ვთქუ: განმაგდე მე.

⁶³კოფ. ვხადე სახელსა შენსა, უფალო, მღჳმისაგან უქუეშისა.

^63aჴმისა ჩემისა გესმა. ნუ დაჰფარავ ყურთა შენთა ვედრებისამო ჩემისა და ღაღადებისა.

^63bშეწევნად ჩემდა მოეახლა დღე, რომელსა გხადე შენ. მარქუ მე: ნუგეშინინ.

⁶⁴რეს. საჯენ, უფალო, სასჯელნი სულისა ჩუენისანი, იჴსენ ცხორება ჩემი.

^64aიხილენ, უფალო, აღძრვანი ჩემნი, საჯე სასჯელი ჩემი.

^64bიხილე ყოველი შურისძიებაჲ მათი და ყოველნი გულისზრახვანი მათნი ჩემ ზედა.

⁶⁵სინ. მესმა ყუედრება მათი, უფალო, ყოველნი გულისზრახვანი მათნი ძალად ჩემდა.

^65aბაგენი ზედაღდგომილნი ჩემნი და წურთანი მათნი ძჳნად ჩემდა დღე ყოველ,

^65bდაჯდომასა მათსა ზედამოიხილე. მე ვიქმენ საჭრტინავ მათდა.

⁶⁶თავ. იხილე ამპარავანება სულთა მათთა და მიაგე მათ, უფალო, მისაგებელი, უფალო, მახე გულისა მათისაჲ,

^66aსაქმეთაებრ ჴელთა მათთაჲსა მიაგე მათ. შეწევნა გულისა ჩემისა რუდუნება მათდა.

^66bშენ იგინი სდევნნე რისხვითა და მოასრულნე იგინი ქუეშე კერძო ცისა, უფალო.