¹უფლის მოშიში ასე მოიქცევა და მტკიცე რჯულით მოიხვეჭს მას.

²დედასავით მიეგებება მას და სიჭაბუკის ცოლივით მიიღებს.

³გამოკვებავს მას გონების პურით და სიბრძნის წყაროს შეასმევს.

⁴მისით განმტკიცდება და აღარ შეირყევა, მიეკვრება მას და აღარ შერცხვება.

⁵აამაღლებს მის მახლობლებზე და გაუხსნის ბაგეს შეკრებილთა შორის.

⁶სიხარულისა და შვების გვირგვინს აპოვნინებს და საუკუნო სახელს დაუმკვიდრებს.

⁷ვერ მისწვდებიან მას უგუნურნი და ვერც ცოდვილნი იხილავენ.

⁸შორსაა იგი ამპარტავანთაგან და ცრუნი ვერ შეიცნობენ.

⁹უამურია ქება ცოდვილის პირით, რადგან უფლისაგან როდია მოვლენილი.

¹⁰რადგან ქება სიბრძნით ითქმის და უფალი კეთილად წარმართავს მას.

¹¹ნუ იტყვი, უფლის განგებით განვდექიო, რადგან ის თავის საძულველს არ გააკეთებს.

¹²ნუ იტყვი ღმერთმა შემაცდინაო, რადგან არ სჭირდება მას ცოდვილი კაცი.

¹³ყოველივე სისაძაგლე შეიძულა უფალმა და არც მისთა მოშიშთა უნდა უყვარდეთ.

¹⁴მან დასაბამიდანვე შექმნა ადამიანი და მისი ხელის ანაბარა დატოვა.

¹⁵თუ მოისურვებ, დაიცავ მცნებებს და კეთილი რწმენით მოიქცევი.

¹⁶მან დაგიდო წინ ცეცხლი და წყალი და, საითკენაც გენებოს, იქით გაიწოდე ხელი.

¹⁷ადამიანის წინაშეა სიცოცხლე და სიკვდილი და, რომელსაც მოისურვებს ის მიეცემა.

¹⁸რადგან დიდია სიბრძნე უფლისა, ძლიერია მისი მეუფება და ყოველივეს ხედავს.

¹⁹მისი თვალი მოშიშებს დაჰყურებს და იცის მან ყოველი საქმე კაცისა.

²⁰ურჯულოება არავისთვის დაუდგენია მას მცნებად და არც არავისთვის მიუცია უფლება ცოდვის ჩადენისა.