¹ხსენება იოშიასი შეზავებულ საკმეველად, რომელიც მემირონემ ოსტატურად შეამზადა, ბაგეებში დატკბება, როგორც თაფლი და როგორც ჰანგი ნადიმზე, ღვინის სმაში.

²მან წარმართა ხალხი მოსაქცევად და ურჯულოების ბიწიერებანი შემუსრა.

³მან წარმართა უფლისაკენ თავისი გული და ურჯულოების დღეებში ღვთისმოსაობა განამტკიცა.

⁴დავითის, ხიზკიას და იოშიას გარდა ყველამ შესცოდა ცოდვით, რადგან დათმო უზენაესის რჯული. გადაშენდნენ იუდას მეფეები,

⁵რადგან სხვებს მისცეს თავიანთი რქა და უცხო ტომებს თავიანთი დიდება.

⁶სიწმიდის რჩეული ქალაქი გადაიწვა და მოოხრდა მისი გზები,

⁷როგორც იწინასწარმეტყველა იერემიამ, როცა იგი შეურაცხყვეს, თუმცა საშოშივე იკურთხა წინასწარმეტყველად, რათა აღმოეფხვრა, ზიანი მიეტანა და შეემუსრა, კიდეც ეშენებინა და დაენერგა.

⁸ეზეკიელმა იხილა დიდების ხილვა, რომელიც უჩვენა ღმერთმა ქერუბიმის ეტლზე;

⁹შეახსენა მტრები ქარიშხალით და კეთილად მოექცა მათ, რომელთაც გამოასწორეს თავიანთი გზები.

¹⁰აყვავდეს თორმეტი წინასწარმეტყველის ძვლები, სადაც არიან, რადგან ანუგეშეს იაკობი და იხსნეს ისინი სარწმუნო იმედით.

¹¹როგორ ვადიდოთ ზერუბაბელი? ის იყო როგორც ბეჭედი მარჯვენა ხელზე.

¹²ასევე იესოც, იოცედეკის ძე; მათ დააფუძნეს სახლი თავიანთ სიცოცხლეში და აღუმართეს უფალს წმინდა ტაძარი, გამზადებული საუკუნო დიდებისთვის.

¹³დიდი ხსენება ნეემიასი, ვინც დამხობილი ზღუდეები აღგვიმართა, დაგვიყენა ბჭენი და კლიტენი, და აღგვიდგინა დანგრეული სახლები.

¹⁴დედამიწაზე არავინ შექმნილა ენოქის მსგავსი, რადგან მიწიდან იქნა ატაცებული.

¹⁵არც იოსების მსგავსი კაცი დაბადებულა, ძმების წინამძღოლი, ხალხის სახსარი. პატივი მიაგეს მის ძვლებს.

¹⁶ადამიანთა შორის განდიდნენ სემი და სეთი, მაგრამ ყველა ცოცხალზე მეტი, ვინც კი შექმნილა, ადამია.