¹ნუ გეიმედება შენი ქონება და ნუ იტყვი, საკმარისი მაქვსო.

²ნუ აყვები შენს სულსა და შენს შეძლებას, ნუ ივლი გულისთქმის კვალზე.

³ნუ იტყვი, ვინ გამიბატონდებაო? რადგან უფალია შენი დამსჯელი.

⁴ნუ იტყვი, შევცოდე და რა დამემართაო, რადგან სულგრძელია უფალი.

⁵შეწყალების იმედით უშიშარი ნუ იქნები და ცოდვას ცოდვაზე ნუ დაურთავ.

⁶ნუ იტყვი, გულმოწყალება მისი დიდია და მრავალ ცოდვებს შემინდობსო, რადგან შეწყალებაცა და რისხვაც მასთანაა და ცოდვილებზე გადმოვა მისი გულისწყრომა.

⁷ნუ აყოვნებ მოქცევას უფლისაკენ და სახვალიოდ ნუ გადადებ, რადგან მყისვე გადმოვა უფლის რისხვა და შურისგების ჟამს წარიწყმედები.

⁸ნუ გეიმედება უსამართლოდ მონახვეჭი, რადგან განსაცდელის დღეს სარგებლობას ვერ მოგიტანს.

⁹ნუ აჰყვები ყველა ქარს და ყოველი გზით ნუ ივლი, როგორც ორპირი ცოდვილები იქცევიან.

¹⁰იყავი მტკიცე შენს ცოდნაში და ერთი იყოს სიტყვა შენი.

¹¹იყავი სწრაფი მოსასმენად და პასუხი სულგრძელობით გაეცი.

¹²თუ გაქვს ცოდნა, მოყვასს უპასუხე, თუ არა და, ბაგეზე გედოს ხელი.

¹³პატივი და უპატიობა სიტყვებშია და კაცის დამღუპველი მისი ენაა.

¹⁴ნუ განითქმები დამსმენად და ენით ნუ იმზაკვრებ, რადგან ქურდს სირცხვილი, ორპირს კი სასტიკი განაჩენი ერგება წილად.

¹⁵ნურც დიდში და ნურც მცირეში უგუნური ნუ იქნები, თუ მოყვარე ხარ, მტრულად ნუ მოიქცევი, რადგან აუგიანი სახელი სირცხვილსა და კიცხვას დაგიმკვიდრებს ორპირი ცოდვილივით.