ღირსი ისიხიოს მმარხველი დაიბადა ბითვინიის ქალაქ ადრინიაში. ღვთისმოსაობაში გაზრდილმა ისიხიოსმა დატოვა სახლი და დაეყუდა მაიონისის მთის უდაბურ ადგილას. იქ მან მოიწყო სენაკი, გააშენა ბოსტანი და საკუთარი შრომით ირჩენდა თავს. ცოტა ხნის შემდეგ წმიდა ისიხიოსთან მოწაფეები მივიდნენ. ღირსმა მამამ ააშენა ეკლესია წმიდა მოციქულის, ანდრია პირველწოდებულის სახელზე. წმიდა ისიხიოსი სიცოცხლეშივე სასწაულქმედების ნიჭით დაჯილდოვდა. ერთხელ მას ეშმაკისეული გოგონა მიჰგვარეს. მშობლების თხოვნით ისისიოსმა იგი განკურნა და იწინასწარმეტყველა, რომ ამ ადგილას დედათა სავანე დაარსდებოდა. მომავალში ეს წინასწარმეტყველება ახდა.

გარდაცვალებამდე 30 დღით ადრე წმიდა ისიხიოსს ანგელოზმა აუწყა აღსასრულის მოახლოებდა. გარდაცვალების წინ მან დაიბარა მოწაფეები და დიდხანს არიგებდა. შიაღამისას სენაკი გაანათა ზეციურმა შუქმა და წმიდა ისიხიოსმა სული უფალს შეჰვედრა(დაახ.790). მისი მოღვაწეობის ადგილას შემდგომ დედათა მონასტერი აშენდა.

 ისიხიოსის წმიდა ნაწილები, რომლებიც დაფლული იყო წმიდა ანდრია პირველწოდებულის სახელობის ეკლესიაში, 792 წელს თეოფილაქტე ამასიელმა გადაასვენა ქალაქ ამასიაში(მცირე აზია).