¹და ჰრქუა უფალმან მოსეს

² და ელიაზარს, ძესა აჰრონისსა, მღდელსა: აღკრიბეთ საცეცხურები ეგე რვალისაჲ შორის დამწუართა მაგათ და ცეცხლი ესე უცხოჲ მიაბნიეთ მუნ, რამეთუ განწმიდნეს

³ საცეცხურები ესე ამათ ცოდვილთანი სულითა მათითა და შექმნან ეგენი პეპელად ჭედილად, გარემოსადებელად საკურთხეველისა, რამეთუ მოიხუნეს წინაშე უფლისა და განწმიდნეს; და იქმნეს ესე სასწაულად ძეთა ისრაელისათა.

⁴ და მოიხუნა ელიაზარ მღდელმან, ძემან აჰრონისმან, საცეცხურნი იგი რვალისანი, რაოდენნი-იგი მოიხუნეს დამწუართა მათ და მოსდვეს გარეშესადებელად საკურთხეველსა

⁵საჴსენებელად ძეთა ისრაელისათა, რაჲთა არავინ მოუჴდეს უცხოთესლი, რომელი არა იყოს ნათესავისაგან აჰრონისა, დასხმად საკუმეველისა წინაშე უფლისა, რაჲთა არა იყოს ვითარცა კორე და კრებული მისი, ვითარცა იტყოდა უფალი ჴელითა მოსესითა.

⁶და დრტჳნვიდეს ძენი ისრაელისანი ხვალის დღე მოსესა მიმართ და აჰრონისა და იტყოდეს: თქუენ მოჰსართ ყოველივე ესე ერი უფლისა.

⁷და იყო, ვითარცა მოიქცა კრებული იგი მოსეს ზედა და აჰრონის ზედა და მოიმართეს კარვად საწამებელისა, და მეყსეულად დაჰფარა ღრუბელმან კარავი იგი და გამოჩნდა დიდებაჲ უფლისაჲ.

⁸და დადგეს მოსე და აჰრონ წინაშე პირსა კარვისა მის საწამებელისა.

⁹და ეტყოდა უფალი მოსეს და აჰრონს და ჰრქუა:

¹⁰გამოეშორენით შორის კრებულისა ამის და აღვჴოცნე ეგენი ერთბამად. და დაცჳეს პირსა ზედა მათსა.

¹¹და ჰრქუა მოსე აჰრონს: მოიღე სასაკუმევლე და დაასხ მას ცეცხლი საკურთხეველისაგან და დასდევ მას ზედა საკუმეველი და მიიღე ადრე ბანაკად და ლხინება ყავ მათთჳს, რამეთუ გარდამოჴდა რისხვაჲ უფლისამიერი და უწყიეს მოსრვაჲ ერისაჲ.

¹²და მოიღო აჰრონ სასაკუმევლე, ვითარცა ჰრქუა მას მოსე, და მირბიოდა ბანაკად და ეწყო მოსრვად ერისა. და დაასხა საკუმეველი და ლხინება ყო ერისა მისთჳს.

¹³და დადგა შორის მომწყდართა და შორის ცოცხალთა და დასცხრა მოსრვაჲ იგი.

¹⁴და იყვნეს მოსრვასა მას ათორმეტ ათას და შჳდას, თჳნიერ მომწყდართა მათ კორეს თანა.

¹⁵და მოიქცა აჰრონ მოსესა კარად კარვისა მის საწამებელისა და დასცხრა მოსრვაჲ იგი.

¹⁶და ეტყოდა უფალი მოსეს და ჰრქუა:

¹⁷ეტყოდე შენ ძეთა ისრაელისათა და მოიღე მათთჳს კუერთხები სახლად-სახლად მამათა მათთა, ყოველთაგან მთავართა მათთა ათორმეტი კუერთხი და კაცად-კაცადისაჲ გამოწერე სახელი კუერთხსა მისსა,

¹⁸და სახელი აჰრონისი გამოწერე კუერთხსა მისსა, რამეთუ არს, კუერთხი ერთი ტომად-ტომადად მამათა მათთა მოსცედ,

¹⁹და დასხი იგი კარავსა საწამებელისასა, ვინაჲ-იგი გამოგეცხადო შენ მუნ.

²⁰და იყოს, კაცი, რომელი გამოვირჩიო მე, კუერთხი იგი მისი განედლდეს, და მოვსპო დრტჳნვაჲ ძეთა ისრაელისათაჲ ჩემგან, რომელსა დრტჳნვენ თქუენთჳს.

²¹და ეტყოდა მოსე ძეთა ისრაელისათა და მოსცეს მას ყოველთა მათ მთავრთა მათთა კუერთხები: კუერთხი მთავრისაჲ ერთი, კუერთხი მთავრად-მთავრად და სახლად-სახლად მამათა მათთა, მოჰსცეს ათორმეტი კუერთხები, და კუერთხი აჰრონისი შორის კუერთხებსა მათსა.

²²და დასხა მოსე კუერთხები იგი წინაშე უფლისა კარავსა მას შინა საწამებელისასა.

²³და იყო ხვალისაგან, და შევიდეს მოსე და აჰრონ კარვად საწამებელისა, და აჰა ესერა, კუერთხი იგი აჰრონისი განედლებულ იყო სახლსა ზედა ლევისსა: და მოეღო ფურცელი და გამოეღო ყუავილი და გამოსცა ნიგოზი.

²⁴და გამოიღო მოსე ყოველი იგი კუერთხები პირისაგან უფლისა წინაშე ყოველთა ძეთა ისრაელისათა. და იხილეს და მოიღო კაცად-კაცადმან კუერთხი თჳსი.

²⁵და ჰრქუა უფალმან მოსეს: დადევ კუერთხი ეგე აჰრონისი წინაშე საწამებელთა დასამარხველად, სასწაულად ძეთა მაგათთჳს ურჩთაჲსა და დასცხერინ დრტჳნვაჲ მათი ჩემგან და არა მოწყდენ.

²⁶და ეგრე ყვეს მოსე და აჰრონ, ვითარცა ამცნო უფალმან მოსეს, ეგრე ყვეს.

²⁷და ეტყოდეს ძენი ისრაელისანი მოსეს და ჰრქუეს: აჰა ესერა, აღვიჴოცენით და წარვწყმდით, აღვესრულენით.

²⁸ყოველი, რომელი შეეხების კარავსა ამას საწამებელისა უფლისასა, მოკუდების, ნუუკუე სრულიად მოვწყდეთ?