¹უფალმა მიწისაგან შექმნა ადამიანი და კვლავ მასვე დაუბრუნა იგი.

²განსაზღვრული დღეები და ჟამი მისცა მათ და უბოძა ხელმწიფება მიწიერებზე.

³მათი ბუნებისდა მიხედვით შემოსა ძალით და თავის ხატად შექმნა ისინი.

⁴ჩაუნერგა მისი შიში ყოველ ხორციელს, რათა ემეუფა ცხოველებზე და ფრინველებზე.

⁵

⁶მისცა მათ აზრი, ენა და თვალები, ყურები და გული, რათა შეეცნოთ ისინი

⁷აღავსო ისინი ცოდნითა და სწავლით და აჩვენა მათ კეთილი და ბოროტი.

⁸დაადგა თვალი მათ გულებს და თავის საქმეთა სიდიადე უჩვენა მათ.

⁹

¹⁰რათა ადიდონ წმიდის სახელი და მისი საქმეების სიდიადეზე მოუთხრონ.

¹¹წინ დაუდვა მათ ცოდნა და ცხოვრების წესი დაუმკვიდრა.

¹²საუკუნო აღთქმა დადო მათთან და უჩვენა თავისი სასჯელები.

¹³დიდების სიდიადე იხილეს მათმა თვალებმა და დიდებულება მისი ხმისა გაიგონეს მათმა ყურებმა.

¹⁴უთხრა მათ: ერიდეთ ყოველგვარ უსამართლობას, და ამცნო თითოეულს მოვალეობა მოყვასის მიმართ.

¹⁵მათი გზები მარადის მის წინაშეა და ვერ დაემალებიან მის თვალებს.

¹⁶

¹⁷ყოველ ხალხს დაუდგინა წინამძღოლი, უფლის ხვედრი კი ისრაელია.

¹⁸

¹⁹მათი ყველა საქმე მზესავით მის წინაშეა და მარადის მათ გზებზეა მისი თვალები.

²⁰არ არის დაფარული მისთვის მათი უსამართლობანი და ყოველი მათი ცოდვა უფლის წინაშე.

²¹

²²როგორც ბეჭედი, მასთანაა კაცის შეწყალება და, როგორც თვალის გუგას, დაიცავს ადამიანის მადლს.

²³შემდგომად ამისა აღდგება იგი, სამაგიეროს მიუზღავს მათ და მათ მიერ გაცემულს მათსავე თავზე მოაქცევს.

²⁴ხოლო რომელნიც ინანიებენ, მიუტევებს და გაამხნევებს მათ, რომელთაც მოაკლდათ დათმენის ღონე.

²⁵მოიქეცი უფლისაკენ და ცოდვები მიატოვე, ევედრე მას და უკელი შეცოდებებს.

²⁶ამაღლდი უზენაესისკენ, უსამართლობას განშორდი და ძლიერ შეიძულე სისაძაგლე.

²⁷ვინ განადიდებს უფალს ჯოჯოხეთში, თუ არა ცოცხალნი და ქების შემსხმელნი.

²⁸მკვიდრისგან, როგორც არარსებულისგან, შემწყდარია ქების შესხმა. მხოლოდ ცოცხალი და მრთელი განადიდებს უფალს.

²⁹რა დიდია უფლის მოწყალება და პატიება მისკენ მიქცეულთა!

³⁰ყოველივე როდია ადამიანებში, რადგან არ არის უკვდავი ძე კაცისა.

³¹რა არის მზეზე ნათელი? მაგრამ ისიც ბნელდება; ასევე ბოროტს განიზრახავს ხორცი და სისხლი.

³²ცის მაღალთა ძალებს ის განაგებს; ყოველი კაცი კი მტვერი და ფერფლია.